• الرئيسية
• اقرأ الحادثة

حالة من الرعب عاشها أهالي منطقة أرض الحافي في القليوبية بعدما اقتحم مجموعة من الملثمين الشارع حاملين أسلحة نارية، وبدأوا في إطلاق النار بشكل عشوائي، مسببين ذعرًا شديدًا بين السكان، وإصابة سيدة وطفلها دون أي ذنب.

كنا بنستعد للتراويح.. وفجأة الدنيا اتقلبت

يحكي صاحب محل سنترال: "بعد الفطار على طول، كنت بجهز أنزل لصلاة التراويح، ومراتي قاعدة في المحل. وأنا بتوضا فوق سمعت صوت ضرب نار، افتكرته صواريخ وشماريخ العيال، لكن الصوت كان مختلف. بصيت من الشباك لقيت شباب ملثمين بيضربوا نار على محل العطارة اللي جمبينا، الدنيا اتقلبت"

نزل صاحب المحل مسرعًا ليجد زوجته مرعوبة خلف الزجاج المحطم: "لقيت باترينة محلي مكسرة ومراتي مستخبية جوه، كانت لحظات رعب، الناس كلها كانت بتجري في الشارع."

البلطجة بقت علني.. والخلافات القديمة ولّعت نار

قال صاحب محل العطارة، الذي كان مستهدفًا: "إحنا في مشاكل مع العتامنة من فترة، ابني ومراته كانوا معديين من قدامهم، عاكسوا مراته وحصلت خناقة، وبعدها رفضنا إنهم يبيعوا مخدرات في نص الشارع، ومن وقتها الأمور ولعت."

واستكمل: "من ٦ شهور حصلت مشاجرة واتحبس ٤، منهم ٢ من عندنا و٢ من العتامنة، واتحكم عليهم بـ ١٥ سنة، ومن يومها واحنا حاسين إنهم ناويين على حاجة، لكن محدش توقع إنهم يلبسوا ماسكات وييجوا يضربوا نار بالشكل ده"

كنت ببيع فول.. رجعوني صفر

وفي وسط الحديث، قاطعنا رجل بسيط بعينين مليانة قهر: "أنا على قد حالي، ببيع فول من سنين، وده مصدر رزقي، كنت رايح أجيب شوية شنط وراجع لعربيتي، لقيت ضرب النار مالي الشارع. طلعت الموبايل عشان أكلم أبويا أطمنه، فجأة واحد من الملثمين حطلي السلاح على راسي وقاللي: هات الموبايل والا هقتلك! مش بس خد الموبايل، لا، خد مني ٩٠٠ جنيه، اللي كنت مجمعهم بالعافية"

طالب أهالي المنطقة بسرعة القبض على الجناة وإنهاء حالة البلطجة في الشارع، قبل ما تحصل كوارث أكبر.